Amdanom ni

Llofnodwyd Bargen Ddinesig Bae Abertawe yn 2017 gan Benaethiaid Llywodraeth y DU a Llywodraeth Cymru ar y pryd, y Prif Weinidog Teresa May a Phrif Weinidog Cymru, Carwyn Jones, ynghyd ag Arweinwyr pedwar Awdurdod Lleol De-orllewin Cymru.

Mae'r Fargen Ddinesig yn rhan o bortffolios Ysgrifennydd y Cabinet dros yr Economi, Ynni a Chynllunio ar gyfer Llywodraeth Cymru ac Is-Ysgrifennydd Gwladol Seneddol Cymru, Llywodraeth y DU. Mae'r Fargen Ddinesig yn gyfanswm buddsoddiad o hyd at £1.3 biliwn dros gyfnod o 15 mlynedd. Mae hyn yn cynnwys £241m o Gronfa Fuddsoddi gan Lywodraeth y Deyrnas Unedig a Llywodraeth Cymru; £396m o gyllid gan y sector cyhoeddus a thua £642m gan y sector preifat. 

Mae Cronfa Fuddsoddi'r Fargen Ddinesig wedi'i dyrannu ar draws tair o raglenni a phrosiectau'n seiliedig ar leoliad a fydd yn cyflawni 36 elfen unigol.

Yn seiliedig ar Strategaeth Adfywio Economaidd Dinas-ranbarth Bae Abertawe 2013-2030, mae Bargen Ddinesig Bae Abertawe yn ddull integredig a thrawsnewidiol o gyflawni maint a natur y buddsoddiad sydd ei angen i gefnogi cynlluniau ar gyfer twf yn y rhanbarth. 

Fel yr amlinellir yn "Arfordir y Rhyngrwyd", y weledigaeth strategol ar gyfer Dinas-ranbarth Bae Abertawe yw creu rhanbarth arloesi clyfar iawn a fydd yn llywio ac yn datblygu atebion i rai o'r heriau mwyaf dybryd a wynebir yn y dyddiau sydd ohonynt ym meysydd cyflymu economaidd, gweithgynhyrchu clyfar, ynni, gwyddor bywyd a llesiant. 

Bydd y Fargen Ddinesig yn cynyddu cyfleoedd ar gyfer hyfforddiant, swyddi a busnes i fusnesau lleol a phobl leol. Bydd hefyd yn codi proffil y rhanbarth fel arloeswr ym meysydd gwyddor bywyd a llesiant; ynni; arloesedd digidol a gweithgynhyrchu clyfar yn rhanbarthol, yn genedlaethol ac yn rhyngwladol.

Mae Bargen Ddinesig Bae Abertawe wedi cyrraedd carreg filltir bwysig ym mis Rhagfyr 2021, lle mae’r naw prosiect a rhaglen drawsnewidiol wedi’u cymeradwyo gan Lywodraeth Cymru a Llywodraeth y DU.
Mae hyn yn golygu bod y portffolio cyfan, yr amcangyfrifir ei fod yn denu £1.3 biliwn o fuddsoddiad erbyn 2033, bellach yn cael ei gyflawni’n llawn a bydd yn darparu cyfleoedd i lawer o fusnesau a thrigolion rhanbarthol.